港聞

港聞二

【Emily】律師會參選人撐平權:有議員老套

【明報專訊】律師會理事8月24日改選,被視為「專業派」嘅5個律師噚日宣布參選,參選人之一陳國豪(Jimmy)講述政綱時,認為律師會應該致力減少年齡、性取向等歧視問題,爭取平權,「我個人覺得律師會呢方面比較保守,冇乜點promote(宣傳)有關平權、同志權益嘅活動……有啲議員律師講嘅言論,呢個係佢個人自由,不過我唔同意、絕對唔同意,(想法)比較老套」。

5「專業派」參選人亮相

宣布參選嘅律師除咗Jimmy外,仲有黃巧欣、傅嘉綿、袁凱英同岑君毅。Jimmy話當選後,希望喺律師會內推動平權,為少數族裔、同志等弱勢團體發聲。建制派議員、律師會前會長何君堯早前批評ViuTV劇集《大叔的愛》涉嫌違反中國國安法;Jimmy回應話唔同意說法,又指身邊有唔少朋友都係LGBT(性小眾)。

袁凱英係現任廣西防城港市政協委員,被問會否因而將政治帶入律師會,佢話會與理事一職分開,「政協嘅功能比較係榮譽性」,日常只係向內地當局提意見。另外,傅嘉綿、袁凱英、Jimmy、岑君毅都話,因工作需要有同中聯辦接觸,但無獲得任何支持或指引出選;黃巧欣就話會接觸社會不同持份者。

早前宣布參選嘅SM & Co Solicitors創辦人馬秀雯(Selma Masood)發聲明,歡迎有其他律師加入參選,又表明自己無政治派別,唔係政協委員,亦無同中聯辦接觸。

相關字詞﹕律師會改選

上 / 下一篇新聞