港聞

港聞二

【Emily】周冠威訪問冇重溫? TVB:版權問題

【明報專訊】自從康城影展上星期五特別放映反修例紀錄片《時代革命》,唔同傳媒近日都有訪問導演周冠威。有網民留意到,TVB《星期日檔案》上星期日(11日)播出、講述近年香港電影發展嘅一集,網站同YouTube都未有重溫,嗰集訪問咗周冠威、田啟文同《遺愛》導演馮智恆,唔少網民就認為嗰集畀TVB「下架」,係因為訪問咗周冠威。

昨午已上載myTV Super

據Emily了解,嗰集《星期日檔案》係因為用咗唔少電影片段,未搞掂版權問題,所以一直未上載重溫片段,而噚日下晝,Emily留意到訪問周冠威嗰集已經喺「myTV Super」上載咗,但YouTube同埋網站仍然冇得重溫。周冠威喺訪問入面形容,香港電影係「保育事業」,就算舊年佢執導嘅《幻愛》票房有超過1500萬,都只係啱啱收支平衡,拍完《幻愛》至今約兩年,一直都未搵到投資者開新戲。

TVB回覆Emily查詢,話嗰集有部分影片要等版權擁有人核實「網絡使用版權」後先可以喺網絡平台完整播放,當完成程序後,嗰集已按正常程序,喺相關網絡平台畀觀眾重溫。

相關字詞﹕周冠威 時代革命

上 / 下一篇新聞