港聞

港聞二

【Emily】郭家麒「登六」 前黨友隔牆祝福

【明報專訊】民主派初選案仍有多人還押,唔少人要喺獄中過生日。噚日就係立法會前議員郭家麒(KK)嘅60歲生日,雖然佢已退出公民黨,但一班前黨友紛紛喺facebook送上祝福,好似早前已離港嘅郭榮鏗就上載二人合照,形容KK係佢政壇路上嘅前輩同好伙伴,「你我之間不必多言,心照一生」,祝願KK生日平安,又hashtag「兄弟撐住」。

KK之前係新界西議員,辭去葵青區議員職務嘅譚家浚(Warren)都上載合照,祝KK生日快樂、一生平安。Warren話喺有限嘅政治經歷當中,大部分都有KK喺度,佢取笑KK「有時真係好煩好長氣」,但都接受到Warren窒佢。

梁凱晴出獄 袁嘉蔚轉還押

此外,觀塘前區議員梁凱晴、南區前區議員袁嘉蔚早前因六四案件認罪,分別判囚4個月。梁凱晴噚日刑滿出獄,照片可見佢明顯瘦咗,剪短咗頭髮。袁嘉蔚就因初選案,刑滿後轉回還押身分,意味親友可以探訪佢多啲,亦可以食更多零食,佢嘅facebook出post話袁嘉蔚非常開心。

相關字詞﹕還押 民主派初選案 生日

上 / 下一篇新聞