港聞

港聞二

【Emily】冇睇《大叔的愛》 林鄭反推薦國劇《號手就位》

【明報專訊】近期最受熱議嘅劇集非《大叔的愛》莫屬,雖然已經大結局,但網上討論未減。特首林鄭月娥噚日出席行會前見記者,就話自己冇特別睇呢套劇,反而主動話自己有睇另一套劇,就係港台「國劇830」時段播放嘅《號手就位》,仲鼓勵大家睇,「很勵志,很正面」。睇番港台嘅簡介,《號手就位》係講述一班大學生畢業後投身火箭軍部隊,喺老兵帶領下嘅成長故事。

《大叔的愛》講述同性戀,雖然唔少人盛讚劇集打破以往電視台對同性戀者嘅污名同定型,但立法會議員何君堯就批評套劇違反中國傳統夫妻「一男一女」觀念,仲講到係違反中國國安法,又形容為「糖衣大麻」。

話同性配偶法律地位

「極具爭議 社會沒共識」

林太噚日被問到目前性傾向歧視立法「十畫未有一撇」、現時法例對性小眾保障係咪足夠時,佢就話香港係比較多元嘅社會,首先大家唔應該有歧視態度,惡毒咒罵有同性戀性傾向嘅人,但佢話都要明白香港社會就進一步賦權或畀同性戀者法律地位未有共識,呢個仍然係非常具爭議嘅議題,相信平機會會適當研究最新情况,畀意見政府。

相關字詞﹕特首林鄭月娥 大叔的愛 同性戀

上 / 下一篇新聞