港聞

港聞二

【Emily】前政助黎穎瑜主持港台節目 山寨式星洲錄音

【明報專訊】民政事務局長前政治助理黎穎瑜(Jade,圖)舉家移民新加坡,佢全職照顧兒子,亦有接唔同嘅project,例如擔任香港電台《夢想號啟航》嘅節目,已經播咗兩集,受訪嘉賓身處世界各地,Jade喺新加坡做訪問後傳番香港。佢透露原來做第一集節目時仲未搵到專業錄音室,唯有用山寨方式錄音,就係冒住30℃高溫,用厚棉胎包住自己錄音,雖然有開冷氣,但每次錄完音都成頭大汗,過程都幾辛苦。每集節目一個鐘,咁樣焗法都幾甘。

Jade話,疫情下好多網紅應運而生,佢之後喺當地搵到一啲共享工作空間,有提供錄音嘅地方。佢認為呢類空間好好,可以畀年輕人喺行唔同事業路線時多啲選擇。東京奧運周五開幕,佢預告星期六節目嘅嘉賓係女生、同奧運主題有關。至於會唔會掛住香港,佢話香港喺佢心中有無可取代嘅位置,一直希望有所回饋。

相關字詞﹕港台主持 黎穎瑜

上 / 下一篇新聞