港聞

港聞二

【Emily】「娥姐」擬再戰立會 嘆難攞提名

【明報專訊】2016年立法會選舉起,新界東有選舉就會見到陳玉娥(娥姐)參選,Emily聽聞娥姐有意再戰12月嘅立法會選舉,並已開始尋求選委支持。娥姐噚日向Emily承認此事,佢強調原定上年舉行嘅立法會選舉時,佢已獲確認提名有效,「有啲嘢未完成,照常理我會繼續」。不過,娥姐話要喺選委會五大界別都拎到提名入閘,對佢呢類「冇背景、冇資源、冇人脈」嘅人特別難。

咁有冇覺得新選舉規則唔公平?娥姐話見仁見智,「我答到,不過我唔會講,今時唔同往日。有呢樣嘢,有前因先有後果,難話啱唔啱、公唔公平,我自己當然唔想有額外要求啦,但你有興趣玩就要適應遊戲規則」。

話拎提名嘥時間 「要同人傾吓偈」

娥姐形容,拎選委提名「真係好嘥我時間,搵人提名你,都要同人傾吓偈㗎嘛」,佢都係機緣巧合咁見到有機會做到選委嘅人,所以向對方「拉票」,但對方話未知自己係咪選委,暫時未有人話畀提名佢。

直選選區重劃,娥姐形容「𠵱家啲區分到好似豆腐膶咁細」,「我可以好肯定咁答你,唔會去港島、油尖旺、觀塘」,佢形容自己「做嘢好focus」,本身選新東,再選都離唔開附近;又認為自己付出咗好多努力,例如搶先打新冠疫苗。

相關字詞﹕陳玉娥 立法會選舉

上 / 下一篇新聞