港聞

港聞二

【Emily】政府話有駁斥謬誤 不滿官府進度報告 張國鈞:做功課心態

【明報專訊】民建聯張國鈞5月喺立法會大會動議「把握契機,改善施政」議案獲通過,政務司長辦公室同部分政策局聯合向立法會提交「進度報告」,入面羅列多項立法工作,如修改選舉制度、公職人員宣誓等;喺「地區行政」方面,政府重申如何監察區議會運作,又話鼓勵分區委員會、地區防火委員會、滅罪委員會,多申請由區議會審議嘅「社區參與計劃」撥款。

政府話,一直透過唔同平台和途徑積極向市民解說政府嘅政策同工作,駁斥謬誤,包括喺政府新聞網設立澄清專欄,喺「添馬台」同政府新聞網facebook專頁以正視聽;又話新聞處和駐外嘅經貿辦,就海外媒體失實報道澄清,上載喺「香港最新消息」專題網頁。

報告鼓勵分區會申請區會審議撥款

Emily未聽過「香港最新消息」專題網頁,喺搜尋器亦搵唔到,新聞處人員教路搜尋「Brand Hong Kong」,再揀選「最新消息」嘅欄目就會搵到。

張國鈞同Emily講,政府呢份回覆只係交代過去一年工作,同佢期望有落差、唔對題,例如「地區行政」,好多立會議員講緊政府部門點樣可以喺地區協作而非各自為政,專員點樣可以有權回應,政府應要切實回應到議員關注。佢話,佢係行會成員,所以知道政府反駁多咗海外失實報道,但市民未必了解,「呢啲就係公務員做功課心態,事實上冇效果,澄清係要畀人知」。

相關字詞﹕改善施政 立法會 張國鈞 政府新聞處

上 / 下一篇新聞