港聞

港聞二

【Emily】曾倡收回起樓 吳秋北去高球場收捐款

【明報專訊】政界就土地房策有唔少爭論,其中工聯會曾提倡收回粉嶺高爾夫球場起樓,而會長吳秋北早前更撰文批評「地產霸權」。不過,吳秋北噚日換咗頂帽,以樂群社會服務處執行委員會主席身分現身粉嶺高球場,仲同地產背景嘅香港哥爾夫球會主席林建岳一齊體驗高球樂趣,相處融洽。

吳任執委主席 樂群獲捐612萬

撇開土地大辯論分歧,吳秋北領導嘅樂群,同高球會有合作項目。高球會話,佢哋推行「哥爾夫樂『童』行——家庭支援計劃」,支援基層學童全人發展,包括為兒童提供現金學習津貼及高球培訓,未來兩年會向樂群捐出612萬元。

收到巨額支票,吳秋北就話多謝,指呢項計劃會幫助到學童。高球場平日唔係一般人可以入去,吳秋北話透過項目,球會畀基層學童及家人喺粉嶺球場內參加定向、攀樹、古蹟及生態導賞、體驗高爾夫球等活動。

林建岳亦話,今次同樂群嘅合作計劃係新嘗試,期望可以鼓勵基層學童追求個人目標。

上 / 下一篇新聞