港聞

港聞二

【Emily】葉劉出書 司局長齊到書展拎簽名

【明報專訊】書展正喺會展舉行,行會成員、新民黨主席葉劉淑儀出咗3本書,包括《走向光明》、《臨界點》、《Regina's English Works for You 5》,噚日下午佢去書展同讀者見面,就獲多名高官撐場,至少包括3名司長、9名局長到場搵葉太拎簽名,十分畀面。

官員關注書中見解 葉劉:欣慰

葉太喺facebook話多謝各位司局長捧場,相片所見,政務司長李家超、財政司長陳茂波、律政司長鄭若驊、公務員事務局長聶德權、勞福局長羅致光等官員,都拉隊去書展支持葉太,唔少人都拎晒葉太3本著作去搵佢簽名。

葉太話,官員唔單止買書支持,仲有認真睇內容,例如運房局長陳帆關注書中有關劏房同埋港鐵嘅建議;教育局長楊潤雄對其英文新書內一篇剖析教育嘅文章印象深刻,仲叫葉太喺該頁簽名,葉太話「頗為欣慰」,期望佢嘅見解可以啟發特區政府改善施政。

聶德權喺facebook話自己係葉太嘅「小粉絲」,預先買咗呢3本書並邀請對方簽名,又不忘「谷針」,話書展人頭湧湧,好彩佢同葉太一早接種疫苗,感染風險大大降低,可以安心逛書展。

相關字詞﹕葉劉淑儀 書展

上 / 下一篇新聞