港聞

港聞二

【Emily】憤怒鳥空襲律政中心女律師 律政司建議同事避眼神接觸

【明報專訊】中環律政中心附近有多名律師遇襲!兇徒竟然係……雀仔!話說律政司6月時以「律政中心憤怒鳥攻擊(Angry bird attacks at JP)」為題,發內部電郵畀同事,透露最少5名長髮女律師喺律政中心附近畀雀攻擊,並喺內部做問卷調查了解情况,建議同事避免同雀仔有眼神接觸。有政府中人同Emily講笑:律政司係咪要告啲雀仔。

Emily睇過份問卷,除咗問及受襲嘅日期、時、地及傷勢外,仲想統計各人性別、頭髮長度,以評估雀鳥有冇特定攻擊對象,仲附圖問埋攻擊佢哋嘅雀鳥品種。

漁署話繁殖期野雀較警戒

律政司政務及發展科其後回覆內部,話接獲有關報告,並引述漁護署話,如走近繁殖期嘅野生雀鳥啲蛋、雛鳥,佢哋可能會比較戒備(defensive),可能會飛近人類,甚至以喙或爪觸碰人類,藉此引導人離開。根據漁護署資訊,有關情况只屬暫時,當雀鳥繁殖期過去就會停止;又建議可以兜路行、避免著鮮色衫、戴帽或者開遮;以及盡快離開原地,但千祈唔好奔跑。

Emily向律政司查詢有幾多職員曾遇襲、傷勢最嚴重係點、傷者可否獲工傷賠償。律政司發言人回覆話收到野生雀鳥喺律政中心一帶出現嘅報告後,已按有關建議提醒同事,會繼續留意情况。

相關字詞﹕漁護署 政府 律政司

上 / 下一篇新聞