港聞

港聞二

【Emily】田二少長氣訴心聲 遭大主席打斷

【明報專訊】特首林鄭月娥噚日到立法會出席答問會,議員提問時亦藉機表達意見,不過實政圓桌田北辰(田二少)可能長氣咗少少,一連提出兩點都未問到問題,仲話自己只係「表達心聲」,最終被立法會主席梁君彥提醒,「𠵱家係行政長官答問時間,請你發問,好嗎?」

本年度通過法案多

林太:過去20年來最有成效

田二少先提起官員款待問題,再講到「劏房」租管,梁君彥起初以為佢提問緊,叫對方只問一條,畀林太答咗先;田二少先話明白,但轉頭就話,「唔係,唔係,我唔係問問題。呢兩個都唔係問題,我係表達我嘅心聲……我個問題嚟緊」 ,叫大主席畀個機會佢。其他議員聽到都忍唔住笑出聲。

林太噚日開場發言時話,過去3個月立法工作取得令人欣慰嘅成效,各政策局未來幾星期將提交5條草案,如果可以喺休會前通過,本屆立法會喺2020/21立法年度通過嘅法案合共有45條,將會係過去20年以來立法工作最繁忙、最有成效嘅一年。

相關字詞﹕立法會 田北辰

上 / 下一篇新聞