港聞

港聞二

【Emily】再有區議員辭職 周炫瑋送競選襟章信封

【明報專訊】區議員將要宣誓,如唔符合宣誓資格或會被政府追討薪津,近一個星期有逾200人辭職,噚日再多幾個,中西區同黃大仙區都只剩番3名區議員,唔夠法定人數補選主席。大埔周炫瑋7月初已請辭,佢噚日就喺facebook上載剩餘物資嘅相,包括競選襟章,同印有佢議員辦事處字樣嘅信封,話歡迎大家去拎,留個紀念,唔想掉晒佢哋、唔想浪費。

陳敬倫:面對任搬龍門 難射最後十二碼

噚日沙田區曾杰、元朗區陳敬倫、東區張國昌都喺facebook宣布已辭職,即日生效;觀塘王偉麟亦宣布辭職,明日生效。曾杰上載辦事處相片,話自己已辭職、辦事處結束運作,叫大家珍重並致歉。陳敬倫感謝選民、戰友、家人等,話「呢場波踢咗90分鐘仲要踢埋加時;已經超出心理負荷。面對住一個瘋狂移動任意搬來搬去嘅龍門,K sir 已經沒有能力射最後嘅十二碼」。

葵青區周偉雄早前宣布辭職,7月19日先生效,佢噚日喺fb話「因應事態發展的急速」,佢辭職生效日期提前至今日凌晨零時,話「引致不便,敬請街坊見諒」。

相關字詞﹕黃大仙區議會 中西區區議會 大埔區議員 區議員宣誓 區議員辭職

上 / 下一篇新聞