港聞

港聞二

【Emily】從港大事件 講到梁繼平前年攻入立會 CY點評學苑時任總編「梁繼昌」

【明報專訊】全國政協副主席、前特首梁振英(CY)喺2015年《施政報告》抨擊港大學生會刊物《學苑》中嘅「香港民族論」主張,噚日佢喺facebook評論港大學生會評議會「感激」議案風波,重提《學苑》有關主張,但寫錯總編輯係「梁繼昌」(立法會會計界前議員,圖1),仲話佢2019年攻入立法會,向在場示威者講話,翌日潛逃美國,批評「細時偷針,大時偷金」。其實梁振英想講嗰位係「梁繼平」(圖2),CY之後喺帖文中更正。

梁繼昌出帖揶揄 稱「一字差千里」

梁繼昌就出帖揶揄:「梁繼昌 梁繼璋 楊繼昌 梁繼平 他們是甚麼人?好亂啊!」仲加上一個喊喊樣。佢並一度轉發CY寫錯佢個名嘅帖文並澄清,自己從來無讀過港大,同《學苑》沾不上任何關係,2019年七一當晚一直喺屋企睇直播,希望對方將名字搞清,「一字之差,相去千里」。

政圈唔少人名字相似,例如立法會嘅建制派議員就分別有謝偉銓同謝偉俊。噚日立法會大會上多個議員蝦碌,想多謝提出議員議案嘅謝偉銓,但就講錯咗做謝偉俊,包括新民黨主席葉劉淑儀同自由黨邵家輝。到工聯會麥美娟發言時,就終於講啱係「謝偉銓」,仲要放慢咁讀,幫手更正,笑言「個個都嗌錯你個名」。

相關字詞﹕港大學生會評議會 梁振英 梁繼昌

上 / 下一篇新聞