港聞

港聞二

【Emily】審引入醫生法案 張宇人田北辰駁火

【明報專訊】立法會審議引入非本地培訓醫生嘅法案委員會,引發自由黨張宇人同實政圓桌田北辰開火,田北辰大罵張宇人「不知所謂,莫名其妙」,連醫學界陳沛然都喺facebook派花生,話兩人有「精采對答」。

田鬧不知所謂 陳沛然fb派花生

事緣張宇人噚日喺會上將田北辰同熱血公民鄭松泰拉埋一齊講,話兩人都同政府講,如張嘅修正案通過,政府應撤回條例;又引述田北辰話「執業試反映唔到專業醫生嘅專業能力」;佢更燒埋新界西選民,話佢哋選出鄭、田及因泛民立選初選案還押嘅郭家麒,「係咪新界西好多醫生、好夠用」。

田北辰反駁,作為新界西民選議員,心知公營醫療系統最緊張、醫生不足,屯門醫院係重災區,佢過去多年都覺得要搵多啲人入公營醫療系統,但要保持質素。

佢澄清之前問及,啱啱大學畢業、未受過專科培訓嘅醫生來港須否考試,因佢唔知海外考試水平,而香港執業試就公認難,「絕對唔係啱啱張宇人指名道姓,話我要求一個喺外國已經操刀好多年嘅專科醫生嚟香港考試」;更批評張「簡直不知所謂,莫名其妙,如果我哋啲議員嘅質素連咁都聽唔清楚,我都唔知將來香港點辦」。

張宇人嘅修正案係要求擴至非港人醫生同樣可經「特別註冊」來港。田北辰同Emily講,佢雖然反對張宇人提出嘅修正案,但冇叫政府若修正案通過應撤回條例。

相關字詞﹕醫生註冊條例 張宇人 田北辰

上 / 下一篇新聞