港聞

港聞二

【Emily】下筆趨難時局依舊 王永平封筆 寄語新時代港人保持良知善性

【明報專訊】政治低氣壓持續,繼中大學者蔡子強早前宣布停寫《明報》筆陣後,曾任公務員事務局長、退休後撰寫評論多年嘅王永平(圖),噚日亦喺其《am730》嘅專欄宣布封筆,話決定停筆嘅原因唔係無事可評,指近期可以講嘅事多不勝數,好似3官員違法聚餐等,但佢感到下筆愈來愈困難,寫出嚟嘅文章亦睇唔到對時局有咩正面作用,「與其欲言又止,不如放下自在」。

「與其欲言又止,不如放下自在」

王永平嘅報章專欄2009年10月中面世,佢噚日喺專欄提到,近日佢最縈懷嘅,係港人喺國安新時代下如何安身立命,佢之前提出3點意見,包括如常生活、留意時事和獨立思考;佢就想加多一點:保持與生俱來的良知善性。佢話身處國安政治嘅大洪流,有人睇到機遇,更多人感到迷惘、無力、不安,但佢覺得只要絕大多數港人,特別係治港嘅「愛國者」對人處事時秉持良知善性,佢相信香港最終可走出困境,再次成為世界一顆璀璨耀目嘅明珠,但同時話「實事求是,這個願景不會在未來5年內見到」。

走出困境願景「不會在5年內見到」

王永平話離開政府後無參與政治活動,評論時事係希望政府施政改善、惠民,又強調完全支持鄧小平設計嘅一國兩制等,指身為中國人,佢希望國家樹立世人景仰嘅文明、民主、道德典範。

相關字詞﹕王永平

上 / 下一篇新聞