港聞

港聞二

【Emily】睇波想起傷膝 李嘉誠加碼資助換關節手術

【明報專訊】李嘉誠基金會創辦人李嘉誠就快93歲大壽,基金會噚日喺社交媒體,刊出誠哥睇住次子、電盈主席李澤楷旗下now新聞台報道歐國盃英格蘭撼意大利決賽片段嘅相(圖),誠哥見到球員腳力凌厲,令佢聯想到「全膝關節置換手術」資助計劃,旋即催促團隊盡快公布資助市民更換關節嘅項目,資助計劃由原來2000萬元翻倍至4000萬元。

增至4000萬元 料多260人受惠

誠哥因為年少時做童工,每日都要搬與自己體重一樣嘅重物而傷膝,加上之後每日打高爾夫球致勞損,故早係2007年赴美做全膝關節置換手術,因而有感而發,喺今年1月開始推出「全膝關節置換手術」資助計劃,撥款2000萬,半年內已幫咗200多名患者。誠哥對此表示好高興,故加碼資助,預計再多260人可受惠。

據基金會資料,第二期「全膝關節置換手術」資助計劃申請期為7月19日至8月18日,申請條件為家庭月入須少於8萬元,並已喺公立醫院輪候逾3年,並以在職者或主要家庭收入者優先考慮。有意申請者只需直接向寶血醫院(明愛)遞交表格,經該院骨科醫生評估後,再按經濟狀况,決定申請人可獲七成半至全額資助。

相關字詞﹕全膝關節置換手術 李嘉誠基金會 李嘉誠

上 / 下一篇新聞