港聞

港聞二

【Emily】卿姐問阿熙「參選救兄弟」論 羅健熙:唔係黨內主流睇法

【明報專訊】民主黨係咪參選今年立法會選舉未有定案,該黨前主席劉慧卿噚日喺其網台節目《議會內外》中,直接問現任黨主席羅健熙,係咪有啲黨友周圍講「參選救兄弟」,意指用參選做條件,換取政府釋放獄中嘅黨友。阿熙話有聽過呢個說法,但話唔係黨內主流睇法,「我一路希望黨內唔好驚,唔好因為恐懼而做任何決定」。

卿姐:趕你哋出區議會嘅風就熱烈

卿姐噚日話,如果有北京官員開聲,講明民主黨可以用參選換取「放人」,咁就另當別論,「但𠵱家逆風都冇人吹過,趕你哋出區議會嘅風就好熱烈,『救兄弟』啲風有冇人吹過?未聽過,係民主黨有人自己撥啲風出嚟」。卿姐似乎唔太認同呢套論述,仲話「唔知有冇『救姊妹』喎,唔知整乜鬼嘢」。

羅:決定參選要考慮唔同因素

阿熙唔知有幾多黨員相信「救兄弟」論,但認為參選決定要考慮唔同因素,例如選舉制度、可唔可以代表市民聲音、做議員嘅作用等,唔應該放大其中一個因素。

卿姐繼續話,有啲人愈講愈大,認為從北京嘅角度而言,唔參選係「敬酒唔飲飲罰酒」,後果好大鑊;但阿熙話唔參選唔代表要搞對抗,笑言希望中央政府唔係咁小器,強調民主黨一直願意同政府溝通。

上 / 下一篇新聞