港聞

港聞二

照賣反修例書 有種文化:堅守出版自由

【明報專訊】《港區國安法》下首個書展今日開鑼,有書店說觸摸不到「紅線」,不敢賣反修例相關書籍,但出版社「有種文化」決定繼續賣,並以「美好世界」為主題,並會寄賣其他出版社的《無權勢者的力量》。有種文化負責人Daniel Wong只盼堅守出版自由,「我覺得只要符合事實與真相, (出版社)唔應該被懲罰或嚴懲」。

稱去年主題「美好世界」今年更啱用

有種文化原本計劃於去年書展主打本土藝術家謝炎安的畫集《謝炎安的彩色美好世界》,並以「美好世界」為題。該畫集收錄謝炎安過去十年的作品,描繪不同年代的香港,例如70年代時期麥理浩新政時代、97年移民潮,亦收錄2010年描繪金紫荊被警察包圍的作品,謝炎安認為不同時期看會有不同感受,「相信現在香港人都會感同身受」。如今該如何解讀「美好世界」,謝認為應為港人留下思考空間。

去年書展因疫情取消,Daniel發現這主題「好似今年更加啱用」,決定沿用,「現在大家置身喺一個美好世界裏面,係咪好有共鳴呢?至於喺現實生活裏面大眾感受到嘅美好世界係點樣嘅呢?真係要問番先知」。

今年有種文化沒出新書,除了上述藝術集,亦會賣去年出版、記錄反修例下14個網媒經歷的《記者上返行人路》。Daniel說,過去一年接洽過約10個出書計劃,部分因作者猶豫,部分因時間趕不及,都未能成事。他會否也感憂慮?他說:「有啲嘢唔重要嘅話,又有危機當然就唔掂為妙啦,但有啲嘢覺得重要嘅話就要衡量……我所講嘅重要嘢當然就係指出版自由。」Daniel稱,不太在意書展生意額,更不太介意賣競爭對手的書,今年會寄賣他欣賞的書,例如《陳健民獄中書簡》及《無權勢者的力量》。

國安法比喻:為防亂過馬路

癱瘓全港交通

Daniel下了一個比喻:「現在好似變咗係,為了防止有人亂過馬路而癱瘓全香港交通, 決定嚴懲所有亂過馬路嘅人,當然交通同國家安全係兩個層次嘅事,但嗰種荒謬嘅感覺係一樣,點樣講一句說話或者貼一張貼紙會令國家唔安全呢?真係睇唔通。」他指香港向來好自由,出版幾乎無太大風險,「現在全世界都知道唔係……風險大咗,係有好多人離開呢一行,但我又同時睇到唔少人加入呢一行」。

有種文化成立10年,公司考慮是否出版或賣一本書時,會特別考慮「夠唔夠破格」。Daniel稱,有種文化開創網絡小說實體化的先河,當年網絡小說有不少粗口,「我哋就睇下點樣解決個問題,例如貼警告字句label,唔會選擇迴避咗個問題或者索性唔出」。然而,觸碰國安法的「紅線」可能要坐監,「如果有啲嘢你想表達,仍然係可以表達到嘅,只係表達方式可能會間接啲或者再客觀啲,從而達到將事實、知識、感情等傳遞畀讀者嘅目的」。

明報記者 黃心悅

相關字詞﹕有種文化 港區國安法 書展

上 / 下一篇新聞