港聞

港聞二

【Emily】大狀生涯暫停 鄒幸彤:終睇到探訪室後生活

【明報專訊】支聯會副主席、大律師鄒幸彤喺七一前夕再被捕,被控煽惑他人明知而參與未經批准集結罪還押。佢近日發獄中信,字裏行間仍顯幽默,話人在牢裏,似乎唯一可做就係轉型做專欄作家,未來幾年縱使無法喺物理上和大家同行,但仲可以用文字「搞事」。佢話以前做大狀只能睇到犯人欄外嘅世界,去大欖都係止步於探訪室,𠵱家終於睇到後面嘅生活,親身實踐、搞懂呢個制度,係難得嘅經驗。

鄒幸彤話,睇嚟佢大律師生涯要暫告一段落,好對唔住佢嘅當事人,突然要拋下佢哋嘅案件。佢提及日前出庭,見到坐得滿滿嘅法庭真係幾感動,不過有點小傷心,「送車師」叫咗一大串名,都冇佢個名。佢形容有啲唏噓,因之前嘅政治案,大部分都係一班人一齊面對,但今日只剩佢一個人喺被告席上,形象地反映反抗運動嘅凋零。

肉乾原子筆停貨 阿臻盼懲教回應

另外,「石牆花」創辦人邵家臻喺facebook話,懲教署指定可買畀在囚者嘅豬、牛肉乾,「優之良品」回覆話最快8月才會重新供應;而指定用嘅BIC原子筆亦停產。阿臻話希望懲教署從善如流,及早按巿面情况迅速回應,以免家屬頻撲、在囚者缺貨。

上 / 下一篇新聞