港聞

港聞二

【Emily】鄧以海官媒專訪被翻 「執法者先自己守法」

【明報專訊】3名保安系統高官參與「犯聚飯局」事件惹爭議,官方解畫話佢哋「敏感度不足」。網民近日就重提舊聞,話飯局主角之一嘅海關關長鄧以海,喺上年7月接受內地傳媒專訪,官方《人民日報》當時仲網上轉載及做圖,大字標題「鄧以海:執法者首先要自己守法」。

睇番篇專訪,鄧以海話佢作為國安委之一,海關唔單止係執法者,如果有關員上街參與非法活動、如果有同事做咗非法行為,佢係「絕不姑息」,佢仲強調「我們作為特區的紀律部隊、作為執法者,自己首先要守法,這一方面絕不能妥協」。特首林鄭月娥日前幫飯聚高官解畫,話要人性化看待宴會食鮑魚,又話佢哋都收咗告票,並受到教訓。

袁海文引「八項規定」:可用唔知情了事?

民主黨袁海文就唔服氣,佢提到官方「人民網」之前嘅報道,話國家主席習近平提出「八項規定」,第一條嘅內容就有「不安排宴請」。報道講,惠陽官員外勤工作時食飯受款待,佢哋食嘅係一般食材,16人加埋係980元人民幣,但官員無畀錢,所以都屬違規受罰。袁問,如果3名港官被款待嘅事喺內地發生,「可以用唔知情就告一段落嗎? 」、 「可以人性化處理嗎?」

上 / 下一篇新聞