港聞

港聞二

【Emily】羅健熙陳欣兒Patreon續服務利東 盼月籌6萬 租辦事處畀街坊聚腳

【明報專訊】隨着宣誓臨近,大批區議員辭職,當中包括服務港島南區利東嘅民主黨羅健熙、陳欣兒,兩人辭職但無意放棄地區工作,推出Patreon希望開設「利東社區空間」,繼續服務街坊,以每月籌得6萬元營運開支為目標,主要開支係辦事處租金、燈油火蠟及聘請同事。羅健熙同Emily講,預咗自己嚟緊都冇糧出,係要睇吓自掏腰包畀幾多錢,但就話希望將以往掙嘅人工用番喺社區度。

羅預咗貼錢 盼以往人工用喺社區

兩人嘅Patreon設6個等級,由最平每月15蚊美元(約117港元)到128蚊美元(約1000港元)都有,如果訂較貴月費,可得到羅健熙拍攝嘅南區風景明信片。

羅健熙話6萬蚊目標雖然訂得較高,但希望租辦事處畀街坊做聚腳點,又話嚟緊辦事處因為利東商場翻新關係要搬遷,預咗貼10多萬裝修。佢亦希望日後做地區工作更多元化、令社區更好玩,有咩計劃就要先賣個關子。

被問到現時多唔多人捧場,羅健熙話都慢慢有人訂閱,不過訂閱Patreon比較複雜,後生仔會較易做到;但有啲街坊科技上冇跟得咁貼,可能就困難少少。如果太少人訂閱點算?羅健熙話自己盡量補貼,但如果唔夠人訂閱,可能都要減少人手喇。

上 / 下一篇新聞