港聞

港聞二

【Emily】余德寶辭職籌5萬 遭前黨友批「嘔心」

【明報專訊】民主派區議員辭職潮未止,公民黨前黨員余德寶早前宣布辭任​油尖旺區議員及副主席,佢前日喺facebook呼籲街坊衆籌5萬元幫佢支付結束議員辦事處嘅部分開支。同樣辭任區議員嘅公民黨前黨員黃文萱喺facebook不點名批評,話公民社會嘅資源唔係取之不盡,而且做區議會副主席嘅人工已經畀一般區議員多,hashtag寫「真係好嘔心呀大佬」、「(佢)仲有間飯糰舖」。

稱要付結束議辦開支 其後刪帖

余德寶喺文中話任內協助超過1萬宗求助個案,「如今,德寶有困難,希望大家可以集氣」,話因為自己突然辭職,唔能夠向政府申領結束議辦開支,估計要自行支付超過8萬元,呼籲大家衆籌5萬元幫忙;帖文其後刪除。黃文萱發文話自己結束議辦時,都係叫人捐錢去612人道支援基金,「辭職都係旨望公民社會有需要時互助,唔係叫你叫街坊科水五萬蚊結束辦事處」。

另一邊廂,潘朗聰辭任荃灣區議員後,有街坊寫心意卡畀佢,話感謝佢嘅努力付出,祝願佢同議辦職員有更美好嘅發展。潘朗聰話「感動」,配上感動流淚嘅表情符號。

相關字詞﹕黃文萱 區議員辭職 余德寶

上 / 下一篇新聞