港聞

港聞二

【Emily】區議員離職 物資派街坊

【明報專訊】政府傳出將DQ區議員兼追收薪津後,聞風辭職嘅區議員數目連日來如籌款數字,不斷攀升。部分辭任者開始執拾議辦,並將物資送贈街坊。大埔區前議員任啟邦就搬出一堆物貨畀街坊認領,包括數個USB喇叭、大量U型助行架及手杖,仲有食飯枱及大批文件夾。深水埗區嘅冼錦豪問有冇街坊打算買蘋果電腦,話佢有部上年先買嘅新機想轉售,開價1.4萬元,目的係攞番少少錢,用嚟幫補房署3個月議辦租金及支付同事遣散費。

冼錦豪賣電腦 幫補租金遣散費

部分議員服務社區多年,今次要提早離場,依依不捨。大埔區未辭職嘅劉勇威就喺facebook話,兩年過去,回顧番佢哋跟進嘅兒童設施大受歡迎,但就唔知能唔夠以議員身分,見證跟進多年嘅隧道升降機落成喇。佢話一路走來,無負大家所望,無愧於心。荃灣區嘅潘朗聰就話講再見原來係咁難,感謝呢幾日街坊搵佢或短訊慰問,「搞到我不時都眼濕濕」。

相關字詞﹕區議員辭職 區議員宣誓

上 / 下一篇新聞