港聞

港聞二

【Emily】網民促李梓敬叫犯聚官員下台 去年轟陳淑莊酒吧聚會 搞聯署促辭職

【明報專訊】保安局副局長區志光、入境處長區嘉宏同海關關長鄧以海接受商界邀請去飯局,同違限聚令被票控,保安局噚日代3名官員致歉。事件勾起網民記憶,舊年時任立法會議員陳淑莊等40多人喺酒吧聚集,涉嫌違反限聚令,新民黨李梓敬當時成立「要求陳淑莊下台大聯盟」,仲發起網上聯署,提出五大訴求,要求公開酒吧CCTV片段、陳淑莊下台同公開道歉等,李當時聲稱收到超過10萬個簽名。

林瑞華:我係咪最有資格要求佢咁做?

陳淑莊單案上個月被判無罪,李梓敬無再提件事,今次有官員「犯聚」,李梓敬隻字不提。網民點會忘記李梓敬呢,唔少「粉絲」喺佢facebook留言,有人問:「你唔係應該即時帶頭拉橫額叫人辭職。定係唔同人唔同雙標(標準),好多人等緊你發號施令。」

facebook專頁「專業清算師」都收到網民提出叫李梓敬成立大聯盟兼搞聯署,要求3個官員下台。舊年同陳淑莊一齊被控違反限聚令嘅中小企食店聯盟召集人林瑞華就留言:「我係咪最有資格要求佢咁做呀?」有人就幫林tag李梓敬,等佢回應。Emily噚日搵過李梓敬,截稿前未有回應。

相關字詞﹕強姦案 鄧以海 區嘉宏 李梓敬 限聚令

上 / 下一篇新聞