港聞

港聞二

【Emily】陳日君呼籲收效 612基金籌款達標

【明報專訊】為反修例運動受傷、被捕者提供援助嘅612人道支援基金,不時呼籲支持者捐款,包括支持月捐計劃,喺6月29日仲上載由基金信託人陳日君拍攝嘅短片呼籲大家捐款,當時指截至6月29日已籌到1393萬元,距離當月籌款目標仲欠107萬元,基金前日喺facebook出post,交代截至6月30日已達標,籌到1504萬元,即係陳日君開聲短短兩日內已籌到過百萬。

612基金前日發文話感謝超過1.4萬名市民支持,為減低基金戶口結餘,希望大家可登記月捐,同埋留意基金定期報告,協助基金「量出為入」,更好咁制訂預算。基金話目前已有超過2926人登記月捐,每月月捐金額約122萬元。

根據基金5月底嘅報告,當時基金可動用結餘為203萬元,而基金由2019年6月成立至今年5月底共收捐款2.32億元,直接向申請人提供嘅人道支援總額近2.13億元,批出項目資助944萬元。

相關字詞﹕612人道支援基金

上 / 下一篇新聞