港聞

港聞二

【Emily】辭職區議員續開記招反私煙 丘文俊:區會一日未被取締都會跟進

【明報專訊】區議員宣誓在即,盛傳大批區議員會被DQ,一班沙田、大埔區議員噚日繼續處理區內民生問題,開記招反映公屋買賣私煙情况,而開記招時,丘文俊、陳兆陽已辭任區議員。對於辭職後仲會點關注私煙問題?丘文俊強調辭職都唔緊要,一日區議會未被取締,佢都會繼續跟進。至於辭職理由,佢就慨嘆自己心灰意冷,想返去湊仔,又話自己經常講私煙問題,但部門冇正視,嘆區議會「做唔到嘢」。

嘆區會做唔到嘢 心灰意冷

唔少屋邨居民都遇過鐵閘出現外圍賭波、私煙傳單,相當滋擾。多名沙田、大埔區議員噚日開記者會反映問題,佢哋提到,經常有可疑陌生人進出區內大廈,甚至喺走廊徘徊,派非法活動單張,居民批評肆無忌憚。

已辭任沙田區議員嘅容溟舟提到,屋邨大廈有保安漏洞畀不法分子兜售私煙,當局應該檢討,又強調私煙可能有雜質,煙民吸入後或影響身體,希望警方、海關多啲執法。沙田區議員盧德明就話不時都有同警方、海關溝通,希望佢哋做多啲去打擊不法活動,但警方都只係派發打擊賭波同私煙嘅單張,遠遠不足。

相關字詞﹕賭波 私煙 區議員宣誓 區議員 區議會

上 / 下一篇新聞