港聞

港聞二

【Emily】多朋友話別 蔡子強送新書

【明報專訊】中大政治與行政學系高級講師蔡子強(蔡子)日前以「疲累」為由停寫專欄,但大家仍有機會睇到佢嘅筆鋒,其實佢舊年靜悄悄出咗《百年修得同船渡》一書,內容係感謝人生路上遇到嘅22位良師益友,包括佔中三子、兩名中大前校長。蔡子話近期頻頻約朋友見面,親手將書當「告別」禮物,因為見嘅朋友唔少要移民,有啲見完後就好快去咗坐監,希望為朋友送上一份心意。

著作感謝22人 包括陳健民前女友

蔡子話呢本書上年印好,但碰正疫情無做推廣,書店都唔易搵到,佢近期索性拎嚟當禮物送朋友。蔡子話其實佢處於近退休狀態,《明報》專欄都暫停,寫呢本書係想回顧自己成長點滴「人生盤點」。Emily睇內容,書中首個感謝嘅係佔中三子之一嘅陳健民,話20多年前同陳健民相遇,當年一班年輕學者成立「民主發展網絡」,提出推動民主倡議,到近年陳健民因佔中入獄,雖然事事無功,但陳入獄前仍然會話「在最漆黑的環境,才能看到星星」。

Emily發現書中結尾有「彩蛋」,原來蔡子都有章節感謝昔日女友,祝願對方活得幸福快樂。書中小故事感人,大家不妨去書店碰運氣,睇吓有無機會買到喇。

相關字詞﹕百年修得同船渡 蔡子強

上 / 下一篇新聞