港聞

港聞二

【Emily】梁美芬玩羅莽「驗證圖」 搵番自己

【明報專訊】登記5000蚊電子消費券嘅市民,先要過「驗證圖」一關,要搵出有交通燈、巴士、十字路口、單車等圖,以證明唔係機械人,唔少人試好多次都被指答錯,甚至要向區議員求助。網上出咗好多惡搞「驗證圖」,經民聯梁美芬噚日喺facebook上載片段,佢嘗試喺混集咗藝人羅莽、兒童節目主持人Harry哥哥(王者匡)嘅相中,搵番自己。

「驗證圖」係由梁美芬個fb小編製作,相信美芬最能夠驗證邊個係自己。「驗證圖」中有戴上眼鏡扮女人嘅Harry哥哥,同扮瑪麗蓮夢露嘅羅莽,梁美芬用咗約11秒就搵齊晒8個自己,仲鼓掌畀自己覺得叻叻。

被fb小編訪問搵自己有冇難度,梁美芬就話「爭啲」,「戴眼鏡嗰啲都要望一望,有時都唔係好熟悉自己戴眼鏡嘅樣,其他都好肯定!」

「撞樣」嘅唔止梁美芬、羅莽同Harry哥哥,仲有特首林鄭月娥、特首辦前常任秘書長丁葉燕薇、已退休嘅民政事務總署前署長陳甘美華,網上有人整咗張有佢哋3個樣嘅「驗證圖」,叫人搵出林太。

相關字詞﹕我不是機械人 電子消費券

上 / 下一篇新聞