港聞

港聞二

【Emily】做唔成副局長 葉傲冬:將到商界發展

【明報專訊】政制及內地事務局副局長懸空,Emily 5月時報道過,民建聯副秘書長葉傲冬(圖)好大機會加入政府擔任該職位,當時已進入最後階段,不過最新Emily聽聞,葉傲冬最終「大熱倒灶」,未能加入林鄭月娥班子。現時擔任《文匯報》助理總編輯嘅阿冬噚晚回覆Emily時證實唔會加入政府,佢話「多謝大家關心,我短時間內會離開《文匯報》,將會到商界發展」。

被林太稱為「世侄」嘅阿冬過去亦有意參選立法會,今次入唔到政府,之後會否參選?阿冬就話選舉並非個人可以決定,要同民建聯協商,有關問題未來再思考。

被問北京有無介入 曾國衞「唔評論」

阿冬入唔成政府嘅消息噚日傳出後,政制及內地事務局長曾國衞被問及有關問題,佢回應話正在物色人選,唔評論個別嘅人選。至於北京有無介入、推翻佢嘅心水人選?曾國衞只係話「唔評論呢啲揣測」。

今屆政府任期尚餘不足1年,呢個副局長職位由今年3月起一直懸空。面對未來有3場選舉要搞,政圈亦盛傳該局政治助理吳璟儁將過檔西九文化局,唔知政府仲會唔會再搵人填補呢個空缺呢?

相關字詞﹕政制及內地事務局 民建聯 葉傲冬

上 / 下一篇新聞