港聞

港聞二

【Emily】出席立會質詢 大讚中共 曾國衞:沒共產黨就沒新中國

【明報專訊】今年係中國共產黨創黨百年,工聯會陸頌雄噚日喺立法會提出口頭質詢,問政府點樣加強市民對中共嘅認識,關注政府有冇機制整理中共喺香港嘅歷史。政制及內地事務局長曾國衞回應話,各個政策局都會做歷史保存工作,佢仲形容「沒有中國共產黨,就沒有新中國;沒有新中國,就唔會有我哋一國兩制回歸祖國」,完全同意加強相關嘅公民及學校教育。

會否設永久展館? 曾:現博物館有內容

曾國衞做入境處長時曾喺辦公室當眼位置放咗印有國家主席習近平肖像嘅瓷碟,引起熱議,佢噚日就大讚中共,話中國百年來面對內憂外患,「中國共產黨篳路藍縷,喺磨難中成長同壯大,最終團結全中國人民」,仲話喺中共領導下,「中華民族實現從站起來,到富起來,再到強起來嘅偉大飛躍」。

其他建制派議員提問時都提及中共嘅成就。經民聯林健鋒話,早前喺北京參觀中共歷史展覽館,「唔止係我國首都新地標,更加係中國共產黨留畀我哋嘅一個偉大文化寶物」。民建聯陳克勤關注會否設立一個永久嘅中共展覽館,曾國衞話現時歷史博物館長期有關於中共嘅展覽內容。

刻下會展有一個中共成立百周年嘅展覽,香港友好協進會噚日拉隊去參觀,包括政協常委唐英年、周安達源,人大代表鄺美雲等。

相關字詞﹕曾國衞 立法會 中共100周年

上 / 下一篇新聞