港聞

港聞二

【Emily】環團「大支嘢」請願 倡膠樽按金最少1蚊

【明報專訊】環境問題大家都好關心,多個環團聯合行動,噚日喺政總外豎起「大支嘢」膠樽請願,要求環保署推行生產者責任法規,採納國際行之有效嘅按樽制,將膠樽按樽金額定為至少1元,增加回收吸引力。環團請願都用環保方式,現場唔用紙本新聞稿,記者用手機掃掃QR Code就有齊採訪資料。

政圈方面,實政圓桌田北辰近日同環境局人員去荃灣海濱視察污水臭味問題。荃灣海濱渠口位現放置咗約160個水凝膠,話呢種物質可以分解臭味源頭其中一種成分——硫化氫,工作人員會每個月更換一次。田二少就話,渠務署𠵱家同科技大學研究緊,試驗用升級版嘅水凝膠,希望能去除有臭味嘅揮發性有機物。

葉劉送23公斤垃圾回收

新民黨葉劉淑儀都話響應回收,同傭人送咗23.8公斤重、六大袋家居垃圾去「綠在區區」回收,當中以報紙為主,仲有鞋盒、飲品盒等。環保署去年推出「綠綠賞」積分卡,市民可憑卡賺取電子積分、換禮物,葉太都換咗一盒廚房抹手紙。

相關字詞﹕田北辰 環保署 回收 新民黨 葉劉淑儀

上 / 下一篇新聞