港聞

港聞二

【Emily】畢東尼赴英 前區議員專頁改名

【明報專訊】畢東尼早前因健康理由宣布辭任觀塘麗晶區區議員,上月1日生效。佢前日喺facebook透露已經去咗英國,專頁由「畢東尼區議員辦事處」改為「返英國食炸魚薯條」(圖);又上載一張新嘅個人資料相,只見佢攞住本酒紅色封面嘅英國國民(海外)護照(BNO),喺香港機場離境大堂向鏡頭揮手道別。

畢東尼噚日持續更新近况,話自己已經安全到達英國嘅屋企,正家居隔離10日,仲分享訂購新冠病毒快速測試套裝。佢並上載英國屋企外貌,窗台放有一張寫住「麗晶花園」嘅紙張,門口有兩塊紙牌,印上寫有「畢東尼」嘅T恤圖案,隱約見到牌上有多個簽名同字句。有網民祝願畢東尼身體健康、生活美滿,亦有人質問「唔係齊上齊落咩?」

去年底麗晶花園第6座爆疫,當時仍係區議員嘅畢東尼去咗英國探家人,並喺fb上載同囝囝食炸魚嘅相,被建制派狙擊。

相關字詞﹕英國 畢東尼

上 / 下一篇新聞