港聞

港聞二

【Emily】梁美芬主演微電影 穿越未來 探討機械人法律道德問題

【明報專訊】經民聯議員梁美芬曾推出《點解要攬炒》等「飲歌」,近日「唱而優則演」,首次擔任女主角拍微電影《2036》,涉獵科幻題材,講自己夢中穿越到未來,藉此帶出對機械人法定權益、外太空法律嘅關注。

出動「新歡」 主動加戲講《基本法》

微電影噚晚喺facebook首播,片長約6分鐘,內容講述美芬穿越時空後,遇上機械人爭取權益等問題,影片想喚醒社會關注人工智能同機械人帶來嘅法律、倫理同道德問題。套戲交由一班少數族裔青年拍攝,美芬首次擔正,雖然之前冇演過戲,但佢話一啲都唔緊張,兩至三日嘅拍攝過程甚少NG,話自己好容易入戲,仲主動加戲大談《基本法》。

美芬嘅「新歡」亦有出場,講嘅就係佢嗰隻訂購機械人「Mini」,價值4位數。美芬話搵咗9個月先買到,又向Emily展示機械人可以唱歌、耍太極、做表情等。美芬話對太空科技好着迷,鍾意睇科幻電影,近期仲研究緊太空法律,打算撰寫學術文章。美芬新作品不斷,佢透露之後會推出4集清談節目,分析太空「法律真空」、美俄曾研究炸毁月球等問題。

上 / 下一篇新聞