港聞

港聞二

【Emily】冰室加入谷針 抽獎送長期飯票

【明報專訊】商界推出抽獎鼓勵市民接種新冠病毒疫苗,獎品都好多元化,最新連茶餐廳都宣布推出抽獎。金記冰室將於7月13日至8月31日舉行疫苗大抽獎,預計送出總值達380萬元餐飲券,包括一世免費食金記。

金記噚日宣布,打齊兩針、持有效香港身分證,兼喺金記冰室惠顧滿50蚊或以上,就可參加大抽獎。根據宣傳單張,一張滿50蚊或以上嘅單可以參加一次抽獎,兩張可以參加兩次,餘此類推。除咗一世免費食金記嘅長期飯票,其他獎品包括1年免費食金記、3個月免費食金記嘅餐飲券,每月上限3000元。

另外,中信股份(0267)噚日都宣布,嚟緊8、9月會舉辦禮品大抽獎,打咗兩劑新冠疫苗嘅合資格香港居民可以參加。獎品包括價值39萬元嘅日產Serena電氣化七人車、價值10萬元嘅中信銀行(國際)信用卡免找數簽帳額等。

相關字詞﹕大抽獎 新冠疫苗 中信股份(0267)

上 / 下一篇新聞