港聞

港聞二

【Emily】「神徒」追巴士影相 車長貼心舉動獲讚

【明報專訊】人氣男團MIRROR成員近日風靡全城,其中「教主」盧瀚霆(Anson Lo)聽日26歲生日,佢嘅粉絲(神徒)喺巴士車身落廣告,架巴士上周末駛到尖沙嘴,吸引逾千人湧去打卡。尖沙嘴西區議員陳嘉朗(Leslie)噚日致函九巴,表揚駕駛廣告巴士嘅司機,大讚佢哋埋站時同其他巴士保持額外距離,方便一班「神徒」上前影相。

區議員函九巴 讚泊位方便「追星」

Leslie話前日喺尖沙嘴碼頭見到暖心一幕,指疫情下嘅香港,難得喺唔影響巴士運作下,等大家感受「車長的愛」,所以特登寫信表揚司機帶來歡樂同安全舒適嘅旅程。Leslie同Emily講,自己唔係粉絲,反而係巴士迷,當日因為怕粉絲聚集引來警員截查,怕雙方有衝突,所以到場陪住市民。

對於巴士司機嘅貼心之舉,Leslie話喺香港愁雲慘霧嘅期間,自發予粉絲方便,等人開心一下,不失為一件美事。至於有警員曾到場呼籲粉絲散去,Leslie覺得其實無必要,「(粉絲)又唔係攞住枝花」。

相關字詞﹕盧瀚霆(Anson Lo)

上 / 下一篇新聞