港聞

港聞二

【Emily】新思維擺站 3至4人想選立會

【明報專訊】立法會選舉12月舉行,新思維主席狄志遠(Dick)同副主席黃俊瑯(Caspar)噚日到大角嘴擺街站,係選舉制度修訂後首次動員落區。Caspar話,目前黨內有3至4人積極考慮參選立法會,以地區直選為主,佢同Dick集中九龍西及九龍中嘅地區工作,因為新思維以往都有參與該區事務,佢哋未來會多落區宣傳同進行形象改善工程。

料逾10非建制參選

Caspar形容,七一銅鑼灣襲警案係社會悲劇,顯示市民同政府之間存有不信任,中央以訂立《港區國安法》等硬手段處理香港問題,雖然平定咗社會動亂,但民心仍未回歸,佢希望利用民生議題修補政治撕裂。對於選情嘅研判,Caspar話感到樂觀,認為會有多過10個非建制派參加直選,呼籲一齊商量對策。Caspar話唔排除派人參加功能組別選舉,物色緊專業界別嘅人,研究參選社會福利界等,但強調要視乎9月選委會選舉結果。

稱按基本法爭「雙普選」

至於新思維定位,Dick話該黨係非建制派,致力改善中下階層生活,並按照《基本法》爭取雙普選,希望同社會各界溝通,議會內外非建制派都能夠增加合作。佢相信香港政治光譜已改變,激進行動會收斂,雖然部分選民可能杯葛選舉,但亦留意到多咗人思考應該實事求是,改善香港未來民生發展等。

相關字詞﹕狄志遠 立法會選舉 新思維

上 / 下一篇新聞