港聞

港聞二

【Emily】公屋聽障租戶 免費裝視像火警警報

【明報專訊】大廈如果發生火警,都係以警鐘通知大家走火警,但聽障者就可能因聽唔到警鐘而有危險。房委會因應聽障租戶需要,免費喺佢哋嘅公屋單位內安裝火警視像警報系統,畀佢哋盡快察覺到火警警報。有意安裝系統嘅聽障租戶可以聯絡所屬嘅屋邨辦事處。

房委會發言人話,去年3月推動呢個自願計劃,係喺技術可行下免費幫有關租戶安裝火警視像警報系統,至今已喺34條公共屋邨逾40個單位完成安裝。發言人又話計劃開始前曾喺公屋單位內試行安裝,並觀察咗一段時間,系統無論喺炎熱天氣或潮濕環境下,運作都係可靠妥善,由於成效理想,因此將計劃推廣,喺聽障租戶提出要求及簽訂承諾書後,就會安排安裝。安裝後如果大廈火警鐘響起,單位內警報燈會同步閃動,通知聽障租戶。

至於「租者置其屋計劃」或「可租可買計劃」屋邨嘅公屋單位,就必須獲業主立案法團同意先可以安裝。

相關字詞﹕火警 聽障 房委會

上 / 下一篇新聞