港聞

港聞二

【Emily】官賈睇《1921》首映 記者要大嗌

【明報專訊】中共慶祝建黨100周年,講述建黨經過嘅電影《1921》月初上映,首映禮噚日喺灣仔會展舉行,一衆高官政要出席,包括全國政協副主席董建華及梁振英、特首林鄭月娥等。咁多政要在場,大會保安都做到足,用鐵馬三面圍封一班記者,喺會場中央設立一個「L」形嘅採訪區。採訪區同大會設立嘅「咪兜」相距甚遠,噚日警務處長蕭澤頤見記者時,一班行家要喊破喉嚨咁「嗌問題」。

噚日會展星光熠熠,除咗高官政要,仲有明星藝人出席支持呢套歌頌中共嘅電影。至於放映廳外嘅記者,焦點落喺近日銅鑼灣襲警案,有記者趁林太行過,大嗌問佢襲擊係咪源於民怨、政府有冇責任等,林太一律冇回應,全晚只有「一哥」到「咪兜」回答問題。

林太噚日致辭時話從建黨百年見到,中共堅持維護國家主權、領土完整嘅信念,並且時刻關心港人福祉。佢仲期望內地同香港嘅電影業能帶來更多富有教育性、具正能量嘅作品,講好中國同香港嘅故事。

相關字詞﹕林鄭月娥 中共百年黨慶

上 / 下一篇新聞