港聞

港聞二

【Emily】陪民主黨出海考察明日大嶼 本研社陳劍青被讚「政策字典」

【明報專訊】一班民主黨成員前日租船出海,邀請本土研究社成員陳劍青做領隊,實地了解「明日大嶼」計劃。該黨政務部長、觀塘區議員鄭景陽話,佢哋一行大約20幾人,圍繞計劃嘅填海區兜咗一個圈,仲喺海上睇埋大嶼山北交通網絡,整個行程大概6小時。鄭景陽大讚陳劍青講得好生動,形容對方係「政策字典」,無論架船去到邊,陳劍青都講到政府喺嗰一帶嘅規劃,話今次真係獲益良多。

去到邊陳講到邊 另邀生態專家分析

鄭景陽同Emily講,自己有到本研社做義工,所以邀請陳劍青講解。佢話明日大嶼係一個大議題,涉及政府開支,覺得黨員應該全面了解計劃,因而發起今次嘅考察團。黨內中委、區議員、助理、實習生都有參與,佢話佢哋喺船上嚴守社交距離嘅限制,考察期間有分開坐。

民主黨話下次可辦街坊團

鄭景陽話,陳劍青請來生態專家,從多個角度分析明日大嶼,包括對環境生態嘅影響、填海原料、工程難度等。佢話直情覺得下次可以舉辦街坊團,等市民都可以增加了解。至於民主黨下個考察地點,佢話政府成日話唔夠土地,下次可以去棕地觀察,了解相關政策。

相關字詞﹕本土研究社 明日大嶼 民主黨

上 / 下一篇新聞