港聞

港聞二

【Emily】自己冇睇過 擔心細路睇完「偏歪咗」 何君堯:《大叔的愛》要過電檢

【明報專訊】ViuTV劇集《大叔的愛》近排熱播,劇集涉及同性戀題材。建制派立法會議員何君堯一向反對同性戀,Emily噚日問佢有冇睇《大叔的愛》,佢反問「(套劇)講咩㗎?講好似我哋咁嘅年紀嘅人?」解釋一番後,佢就話播放唔係問題,但劇集要通過「電檢」審查,標明係咪適合兒童收看、適合幾多歲嘅人收看,「你稍為心智明白、成熟咗,你鍾意睇咪睇嗰啲囉,但你要有『電檢』嘅級數……(因為)細個冇經驗,睇嘅時候會偏歪咗」。睇番資料,呢套劇有標示係「PG家長指引」類別。

新民黨主席葉劉淑儀早前發言支持同樂運動會,佢噚日話雖然冇睇過《大叔的愛》,但認為如果唔涉及淫褻、色情等因素,而係描述真摯嘅愛,無論係同性或者異性都冇問題,「如果係真摯嘅或者柏拉圖式嘅愛,根本好感人𠻹,同性別無關」。葉太又同Emily分享最近睇戲心得,話日前參加完北京黨慶活動返港,喺飛機上睇完《狂舞派》,大讚演員「跳得幾好」。

葉劉:真愛無關性別

葉太今年七一獲頒大紫荊勳章,政界以至網民都關注佢會唔會競逐下任特首,佢同Emily講「網民想太多」,話自己照常工作,「你知道我個人啦,唔做嘢會覺悶」。

相關字詞﹕同性戀 葉劉淑儀 何君堯 大叔的愛

上 / 下一篇新聞