港聞

港聞二

【Emily】京觀黨慶 霍啟剛:想起2001

【明報專訊】慶祝中國共產黨成立100周年大會噚日朝早喺北京天安門廣場舉行,唔少獲邀上京出席儀式嘅政界人物,都喺facebook上載相片,好似港區人大代表陳曼琪就分享一張相,顯示大會向嘉賓送上印有中共建黨100周年標誌嘅太陽帽同袋;全國青聯副主席霍啟剛則於fb分享喺現場影嘅相,佢形容近距離睇到解放軍戰鬥機低空飛行表演,引擎聲震耳欲聾,加上莊嚴雄壯嘅軍樂聲同激昂嘅合唱團歌聲,氣勢磅礴,非常震撼。

陳曼琪收太陽帽同袋

霍啟剛話,企喺天安門廣場嘅一刻,思緒一下子回到2001年北京申奧成功嗰日,同樣企喺天安門廣場、同樣感到無比壯觀同澎湃,而噚日更多嘅係體會到國家富強和人民幸福帶來嘅滿足感、自豪感。

港區人大代表吳秋北就話,親身見證歷史時刻,感受到中共嘅強大力量同中國人民對執政黨嘅深切愛戴。

林琳分享鄧局長合照

民建聯林琳分享佢搵到「炳強BB」保安局長鄧炳強、入境事務處長區嘉宏同廉政專員白韞六合照。另外,香港佛教聯合會會長寬運法師接受《文匯報》訪問時話,作為宗教界代表去現場聆聽習主席呼喚「真幸福」,又感謝國家嘅眷顧與關懷。

上 / 下一篇新聞