港聞

港聞二

【Emily】「水上的士」首航 乘客可上甲板賞維港景

【明報專訊】「水上的士」噚日首航,喺噚晚6點開出嘉賓航班,喺7點20分開出特別班次畀市民乘搭。Emily試搭,船內設藍色高背椅,感覺船速較慢,上下兩層可容納170名乘客。船上設有Wi-Fi、三語導航;有水吧售賣飲品,仲有育嬰室等設施。乘客仲可以登上甲板欣賞維港夜景同「幻彩詠香江」匯演。

全程約70分鐘 成人票全程48元

「水上的士」暫以試辦方式營運,由7月3號起逢周六晚上7點20分開出一班,喺紅磡碼頭出發,途經中環9號公眾碼頭、尖沙嘴碼頭1號梯台,再返紅磡,乘客可選擇喺邊個站點上落。全程約70分鐘,成人全程票價48元;若由紅磡去尖東就收費10元,尖東去中環收費14元。

富裕小輪有限公司商務總監李志剛話,7月3日船飛賣晒,但由於疫情反覆,好難估計未來客量同幾時收支平衡,期望通關後有改善。至於「水上的士」主線幾時啟航,佢話要睇疫情發展。

有獲邀搭嘉賓航班嘅旅行社負責人向Emily表示,「水上的士」可以畀乘客觀賞維港景色,有信心吸引到外地客。吳小姐因船飛賣晒未能上船,佢話覺得水上的士好特別,因香港首次出現呢種娛樂性質嘅交通工具,但覺得班次太少同票價略貴。

上 / 下一篇新聞