港聞

港聞二

【Emily】金紫荊升旗用普通話中式步操 李家超主禮七一酒會 多人「集郵」

【明報專訊】噚日係七一回歸24周年,灣仔金紫荊廣場早上舉行升旗儀式,護旗方隊首次採用中式步操進場,連指令都轉埋用普通話。升旗儀式今年因為疫情同樣不設公眾觀禮區,出席儀式嘅嘉賓包括署理特首李家超、前特首曾蔭權及夫人、行政會議召集人陳智思等。去年七一正值《港區國安法》啱啱生效,升旗禮地點設有《港區國安法》嘅宣傳板,今年就未見類似安排。

升旗儀式有600人出席,隨後嘅慶回歸酒會就有880人出席。酒會嘉賓以4人一枱,每人獲發一支水同一個點心禮盒,但酒會期間唔可以飲食。李家超噚日首次以署理特首身分為酒會主禮,進場時由民政事務局長徐英偉等陪同。李家超一路行一路同其他嘉賓點頭揮手,仲雙手作揖,嘉賓都有回應,而李家超亦唔似往日咁嚴肅拘謹,喺台上祝酒時笑容燦爛。李家超噚日都幾受歡迎,活動結束後唔少嘉賓要求同佢合照,前後影咗十幾分鐘先離開會場。民建聯議員葛珮帆成功「集郵」,更即時將合照上載facebook。

上 / 下一篇新聞