港聞

港聞二

【Emily】送禮「賀黨慶」 遭建制嘲笑 關永業:大家自己玩味啦

【明報專訊】新民主同盟上周六(26日)宣布解散,大埔區議會主席關永業同日派禮物畀街坊,並喺facebook帖文寫住「慶祝建黨百週年,派發小禮物,派完即止」。噚日多名建制派議員紛紛抽水,民建聯何俊賢喺fb話「你唔係咁難睇下嘛」,指關永業一退黨就「跳去共產黨」,話如果有打開三國志,就知佢忠誠度低過呂布。

建制諷「忠誠度低過呂布」

民建聯陳克勤就話,呢頭新同盟解散,「關永業議員唔洗(使)一日就極速變面」。工聯會陸頌雄問,呢頭解散自己個黨、嗰頭慶祝另一個黨百周年係咩玩法;又話佢喺大埔富善邨有辦事處,問關永業「咁開心慶祝建黨百周年做乜唔叫埋我呀?」。

關:政治立場冇變

對於建制派抽水,關永業接受Emily查詢時就強調,自己政治立場冇變,由以往嘅帖文都見到,不過佢就覺得,政治嘅嘢「係咪有啲幽默感?」,又叫大家自己玩味啦。睇番佢早前嘅帖文,不論係派白蠟燭叫大家「毋忘六四」,抑或去《蘋果日報》所在嘅壹傳媒大樓,關永業都冇缺席。

相關字詞﹕大埔 工聯會 建制派 民建聯

上 / 下一篇新聞