港聞

港聞二

【Emily】「屯馬~開通~真的很~興奮」掀改詞接力

【明報專訊】港鐵屯馬線全線前日通車,呢兩日社交網站被幾個鐵路迷「洗版」,尤其係接受無綫電視訪問時,將英國民謠《綠袖子》(Greensleeves)譜上「屯馬開通真的很興奮」歌詞嘅羅先生,更加成為熱話。

薑檸樂填詞寫「12歲鐵路迷」

唔少人更將羅先生嘅二次創作進一步「三次創作」,例如作曲家劉力致就將羅先生一句「屯馬開通真的很興奮」剪接成一首一分鐘嘅完整版;網絡紅人「薑檸樂」就接住羅先生繼續填詞,「等等等超過十年,自佢一出世便期待這次」,將接受now新聞訪問時表示已經「等咗」屯馬線12年嘅12歲鐵路迷嘅興奮心情表露無遺。

不過亦有人藉改歌表達不滿,二創平台「狼少Wolf」就將首歌改為《屯馬開通真的很悲憤》,因為「一等等咗十二年,要等車費跌就要等廿年」。噚日係屯馬線全線通車後首個工作日,啟德站爆水管,網上即刻出現新版本歌詞「屯馬漏水真的很興奮」。

其實港鐵同《綠袖子》都好有緣,港鐵2016年已邀請咗熊熊兒童合唱團拍廣告,當時正正就係將《綠袖子》填上廣東話歌詞,主要都係宣傳搭車禮儀,例如「望向車廂King-size人牆」,呼籲乘客企入車廂中間。

相關字詞﹕二次創作 屯馬通車真的很興奮 屯馬線

上 / 下一篇新聞