港聞

港聞二

【Emily】小編黑雨一除撲探監 感動阿尹

【明報專訊】噚日朝早風雨交加,天文台喺8點20分發出今年首個黑色暴雨警告,懲教署規定黑雨冇得探監,至11時05分天文台改發「紅雨」警告。荔枝角拘留所嘅探訪登記時間中午12點完結,正還押嘅劉頴匡(Ventus)、民主黨尹兆堅嘅親友即刻趕去探監,風雨無阻。

尹兆堅facebook嘅小編話,佢喺黑雨後立即趕去荔枝角探訪,形容當時嘅「驚險」情况,話自己11時58分先落車,遠望已見到登記室懲教人員企喺門口前不斷對表等閂閘,小編冒住傾盆大雨向登記室狂奔,「達陣」後懲教人員亦將大門鎖上。

劉頴匡女友都趕到

小編話,阿尹留意到佢頭髮仲有水滴,又留意佢多咗暗瘡,關心佢係咪工作壓力太大;當說再見一刻,阿尹突然喺玻璃窗遞上一張寫住「多謝你哋做我同事!」便條,雙手合十,微微鞠躬。小編話想回覆阿尹一句:「多謝你做我老闆,讓我可以在外挺起胸膛跟街坊說,我老闆是尹兆堅!」

劉頴匡女友Emilia就話,當佢發現黑雨變紅雨時已經係11點13分,佢要由屯門去荔枝角,趕到腎上腺素飈升,最終都趕得切。Ventus仲唱歌畀佢聽,「黃雨~探訪~真的很~興奮」,又話辛苦晒Emilia。

相關字詞﹕尹兆堅 劉頴匡

上 / 下一篇新聞