港聞

港聞二

【Emily】馬會招募賽事見習學員

【明報專訊】有無想過做騎師?5年前入讀見習騎師學校嘅賽事見習學員黃寶妮(Britney),喺學習騎術進度上一度遇上樽頸,但佢無放棄,「入學前,我係一個遇上難關就好容易放棄嘅年輕人,但喺見習騎師學校訓練後,我學會凡事都要堅持,因為只有堅持,先唔會令自己後悔」。

寶妮話本打算中學畢業後做救生員,但中五暑假媽媽建議投考馬會賽事見習學員,經重重測試終獲取錄。

22歲嘅寶妮早前喺沙田馬場參與41個試閘(即模擬比賽),正等緊去澳洲培訓。佢勉勵後生女仔要勇敢追夢,「雖然女孩子體能一般唔及男仔,但唔好畀呢個框框局限自己,若然有興趣以賽馬做職業,不妨畀自己一個追夢嘅機會」。

馬會正招募新一屆「賽事見習學員」,即日起至7月30日接受申請,凡滿15歲同完成中三課程、有志投身賽馬專業者均可申請,名額約25個,入職薪酬超過1.1萬元。申請者身高無限制,但見習騎師體重要求約103磅,策騎員則約125磅。

見習騎師學校校長陳念慈話申請人最緊要睇品格同態度,即使對馬無認識都可以好快學識,唔使策騎經驗。

上 / 下一篇新聞