港聞

港聞二

【Emily】議員區會提「新聞自由」 官員即走 葉錦龍:按議規發聲明 冇提《蘋果》

【明報專訊】被港府用《港區國安法》凍結資金嘅《蘋果日報》停刊,噚日出版最後一份報紙。中西區議員葉錦龍喺facebook話,噚日喺區議會會議根據會議常規作出口頭聲明,提到香港連新聞自由都喪失,聲明冇提《蘋果日報》,但講到「新聞自由」4字,民政事務專員未等議員解釋,就話新聞自由唔屬於區議會討論範圍,拉隊同一眾官員離場。

官員話新聞自由不屬討論範圍

葉錦龍話,中西區區議會噚日開樓宇管理、環境衛生及工務委員會會議,會議開始時佢作口頭聲明,慨嘆區議員喺現今社會嘅無力,連自己所屬選區嘅回收箱位置都唔可以改變,而急促轉變嘅香港形勢,連香港嘅新聞自由都喪失,點知民政專員就帶隊離場。佢之後為香港新聞自由默哀一分鐘,默哀完畢後專員先返回會議室開會。

佢喺fb話,對於政府漠視民意,再度離席深表遺憾,佢將會喺合法情况下,盡量為市民發聲到最後一刻。佢又反問:「一份不斷揭露政府錯誤與官商勾結,又仔細報導社區問題的報紙,今日被迫至停刊,又怎會不影響居民的福祉?又如何不符合區議會條例的法定範圍?」

相關字詞﹕中西區區議會 民政專員 區議會 葉錦龍

上 / 下一篇新聞