港聞

港聞二

【Emily】黎智英書現石塘嘴圖書館長推介架 未講係咪館長所為 康署:倘涉員工嚴肅處理

【明報專訊】《蘋果日報》停刊,壹傳媒創辦人黎智英正喺獄中服刑。民建聯中西區支部主席楊學明喺facebook話收到市民反映,康文署轄下石塘嘴圖書館「館長之選」書架上,放有多本被控「串謀勾結外國或者境外勢力危害國家安全罪」嘅黎智英相關書籍。

Emily向康文署查詢揀選「館長之選」嘅準則,以及黎智英相關圖書係咪要下架。署方發言人出稿話正嚴謹及詳盡調查事件,若有任何員工牽涉在內,會諮詢相關部門,並按照既定機制嚴肅處理,採取適當行動,但未有講明係咪館長所為。發言人又話,當發現有關館藏涉嫌內容可能違反國安法,會暫停有關館藏服務,研究內容係咪違反有關法例。

倘圖書或違國安法 會下架研內容

楊學明同Emily講,好多市民向佢反映黎智英涉犯國安法,但館長竟然推介關於黎智英理念嘅書籍畀市民。至於黎智英涉犯嘅國安法案件未有裁決,唔放得有關書籍係咪未審先判?楊學明認為進入司法程序期間,館長咁嘅推介係異於常人;佢去石塘嘴圖書館了解,搵館長查詢,但館長正放假。民建聯副主席陳學鋒同Emily講,黎智英過去一段時間非法集結罪成、涉犯國安法,係戴罪之身,如政府部門人員趁噚日《蘋果日報》最後一日出版而抽水,係抽着火水,認為係作無聲嘅政治表達。

相關字詞﹕陳學鋒 楊學明 民建聯 康文署 石塘咀圖書館

上 / 下一篇新聞