港聞

港聞二

【Emily】民建聯辦「賢路」選黨內人才 要考通識問答

【明報專訊】民建聯早排搞「政道」治政理念研習班,吸引黨內外嘅人超額報名,該黨副主席張國鈞同秘書長王舜義噚日向傳媒介紹佢哋嘅第二步計劃——「賢路」,並開始喺黨內甄選人才。張國鈞話第三步係希望建立人才庫,可以加入政府、參選,同埋各類諮詢委員會。被問到係咪會依據賢路或人才庫嘅結果嚟派人出選立法會、選委會選舉,佢就話同未來幾個選舉無關,將來點派人參選,係由執委會決定。

話入得人才庫 唔代表會參選

王舜義形容呢三部曲係「金字塔式」,最頂係精英,想用科學化數據提供人才。張國鈞話賢路考核項目對參加者好大挑戰,係「木人巷」,包括要求參加者交3000字嘅政策倡議文章,噚晚就有通識問答,仲有按圖即場演說、辯論等。

張國鈞話會從4方面評核,分別係政治才能,即判斷力、執行力;政治品德,即忠誠、廉潔、有品德;業務品德,即盡責、顧全大局;以及業務職涵,即過往貢獻、親和力及團隊精神,評核由王舜義同埋會務顧問負責。佢話唔係所有人都會入到人才庫,入到嘅人會有強高度嘅培訓,有重量級老師帶住。

張國鈞又透露主席李慧琼同幾位副主席、大部分議員都有參與甄選,參加者都好認真,唔係玩玩吓。

相關字詞﹕王舜義 張國鈞 政道 賢路 民建聯

上 / 下一篇新聞